14 nov. 2011

نظرتي الى تونس المستقبل..

تونس الي نحلم بيها...
نحب تونس تولي للناس الكل.... أي مواطن يعيش حر كيما يحب هو و لا حد يقلقو، الاسلامي و اليساري و الشيوعي و الليبارالي، و الصحافة حرة، حد لا يتحكم فيها. كلمة حزب حاكم تتنحى مالقاموس، و الي يحب يمارس السياسة يلقى كيفاش و في الاتجاه الي يلوج عليه. عدالة اجتماعية، الزوالي يلقى كيفاه ياكل و نعاونوه و نشريولو كان لزم و نمدوه بالمرافق الاساسية، و الي لاباس عليه يكون مسؤول و يخلص ضرائبو الكل و أكثر من أي شهار ولا خدام. نحب ولد الحي الشعبي يلقى خدمة و ما يرميش روحو في البحر من كثرة يأسو و يتسلف باش يحبسوه ولا يمرمدوه في الغربة و يروحو بيه مطرد. . نحب البنية الي تخدم في المعمل و لا في الديار على عايلتها ما يستغلها حد و تتمتع بالحقوق الاساسية الي تضمنلها كرامتها.. نحب لوليد الصغير ولد الريف يلقى كيفاش يتعلم، و يقرى، و كيفاش يمشي للمكتب من غير ما يضرب على ساقيه سوايع في الطباعي و في الڤلت، و ما نحبش الي قدو في حي راقي يضرب الدروس الخصوصية و يقرى في تعليم خاص خاطر التعليم العمومي مستواه تردى. نحب تونس للناس الكل، و امخاخنا تتبدل، تولي أكثر رقي و وعي، و كل واحد يتلاهى بروحو و ما يحاولش يبدل غيرو، و يحترمو أكثر المواطنات الي هوما و ياهم على نفس قدم المساواة... نحب تونس حرة مستقلة بأتم معنى الكلمة، لا تحكم فينا فرنسا ولا أمريكا و لا قطر و لا غيرهم و لا عندنا ديون تجاههم. كل واحد يلقى كيفاش يعيش مستور، و الترفيه متواجد للناس الكل. نحب دولتنا تكون قوية ماديا، و جامعاتنا و معاهدنا تخرج أحسن ما فمة في الشهادات.

ابكي علي ما يفهمكش و يناقش في وهم "الهوية" !!!

25 juil. 2011

شوية اجابات على بعض التساؤلات: أنا أصوت اذن أنا موجود



اليوم، نحتفلو بالذكرى 54 لعيد الجمهورية، و لو أنو جمهوريتنا لتوة لا شافت النور، بعدة مالاستقلال حتى ليوم 14 جانفي قعدنا عايشين في نظام شبه اقطاعي، يحكمو فينا 4 عايلات. للسبب هذا التونسي ما ستانسش بالنظام الجمهوري، و اذن ماهوش مستانس لا بالانتخابات لا بدولة القانون و المؤسسات و لا بالأحزاب.
اليوم، و بعد 14 جانفي، ولاو عنا عشرات الأحزاب، و التونسي باهت يقلك تي شكونو هذا؟؟؟ منين طلعلي ؟؟؟ شنية مجلس تأسيسي؟؟؟ أحزاب تتعارك و تتكالب، ملا فضايح!! الواحد كان يحل القنوات المحلية بش يرقد ولا يتفرج في ماتش كورة، توة وين ما يحل يلقى عركة و صياح و عياط؟؟؟؟

براف، المواطن التونسي جاتو نوع مالصدمة النفسية و الاجتماعية، كان في حالة تصحر سياسي خلقها زعبع و جماعتو، ولاّ يشوف في الناس الكل تتكلم في السياسة و في ولاد حومتو عاملين حزب؛ آش خلى الأغلبية ما تقيدش لانتخابات 23 أكتوبر الجاي... و كل واحد عندو السبب متاعو، أنا بش نحاول نجاوب على بعض الأسئلة المتداولة فماشي ما كل تونسي يقرى المدونة يولي يخمم باش يقيد و يمارس حقو.

س: علاش ننتخب؟؟ السياسة ما تهمنيش!
ج: أي مواطن في دولة مدنية عندو حقوق و واجبات، و من حقوقو أنو ينتخب الهياكل الي تحكم فيه، من رئيس و برلمان و أي هياكل انتخابية أخرى (كيما المجالس البلدية، و المجلس التأسيسي هذا)

س: شباش يعمل المجلس التأسيسي؟؟ ماو كيما مجلس النواب متاع بن علي!!!
ج: لا، المجلس التأسيسي هو الي بش يعمل مسودة دستور للبلاد، يعني يعطي الخطوط العريضة للدستور و ينظم استفتاء شعبي في أهم المسائل، كيما نوعية النظام الجمهوري الي بش نختاروه (رئاسي، برلماني ولا شبه رئاسي)، الخ... يعني الأولوية هي الدستور، و أي قرار مصيري بش يتحكم فيه الشعب من خلال الاستفتاء هذا، يعني يمشيو المواطنين يصوتو "نعم" أو "لا" للقرار هذا.

س: كيفاش بش نصوت و أنا مانيش في حتى حزب؟؟؟ تي ما نفهم شي!!
ج: الانخراط في حزب ماهوش واجب، هو اختياري، فمة عباد تحب تمارس السياسة، و عباد لا، و هذا ما يمنعهمش من التصويت و الانتخاب، بالعكس، المواطن عندو الحق بش يختار الحزب الي يساعدو و الي يعجبو، حسب البرنامج متاعو، ولا ينجم ينتخب القائمات المستقلة، الي هوما مواطنين مرشحين رواحهم ما ينتميو لحتى حزب.

س: باهي كيفاش بش نختار حزب و أنا ما نعرفهمش و ما نعرفش برامجهم؟؟
ج: صحيح، توة ما نعرفو شي على الأحزاب، و ما شفناش برامج، لكن ما ننساوش الي مواعيد الحملات الانتخابية لتوة ما بدات، خاطر الحملات الانتخابية مقننة في العالم أجمع، في التوقيت و في الميزانية و في كل شي، باش الأحزاب الكل تكون عندها نفس الفرصة و الامكانيات تتقارب.

س: فاش قام ننتخب، تي فكني بالله، ماهو انتخابات مزورة كيما عهد بن علي!!
ج: هاو توة فمة هيئة مستقلة تنظم في الانتخابات، و أي متطوع تتوفر فيه شروط الناخب ينجم يمشي يراقب في مركز الاقتراع متاع حومتو، هذا راهو شأن شعبي، مصير البلاد الكل بش يتقرر، و الانتخابات ما تنجم تنجح و يتنحى التزوير كان بنسبة مشاركة قصوى، يعني المواطنين الكل يتحشدو و يكونو واعين بأهمية هالانتخابات و يكونو بالمرصاد للممارسات هذي.

س: أيا مالا مانيش بش ننتخب خاطر لا الحكومة الحالية شرعية (الي قررت هالانتخابات) و لا الهيئة العليا لتحقيق أهداف الثورة شرعية و لا الهيئة العليا المستقلة للانتخابات شرعية!! القرار هذا ما يمثلنيش!!
ج: هذا الكلام صحيح و لكن ما تنساش الي الاقتراع هذا باش يخلي الهيكل الجاي و الي هو المجلس التأسيسي يستمد شرعيتو منا، يعني الانتخابات هذي فرصة بش نخرجو من دوامة اللاشرعية و اللاتمثيلية و نشوفو بالرسمي المواطن شباش ينتخب، يعني بصوتي أنا و بصوتك انت و بصوت الآخر بش نفهمو الخيار الحقيقي للشعب التونسي، و ما تنساش زادة الي دستور بن علي مشوه، يفتقر لأدنى شروط الديمقراطية و الجمهورية، لا فيه فصل بين السلط و الرئاسة فيه مدى الحياة و النظام متاعو رئاسوي، دستور ما يسمح بشي ! 
 حتى كانك مكش راضي على القرار متاع المجلس التأسيسي، القرار هو بيدو عطاك الفرصة بش تعبر على رايك، لواش تضيع في الفرصة، شوف المترشحين و انتخب الي يقنعك، منغير أحكام مسبقة، جرب و شوف! و من بعد حتى شي ماهو نهائي، يقعدو الاستفتاءات خدامة في القرارات المصيرية، بش تعبر بالرسمي على رايك ! و الدستور بش يمثلك !

س: أنا ما نحبش هالمجلس هذا نحب انتخابات رئاسية طول طول ولا برلمانية!! 
ج: وه وه وه ! كيفاش انتخابات رئاسية و تشريعية طول؟؟ و هاك الدستور الهايل الي خلاهونا زعبع، شوف انت المآزق الي طحنا فيها من 14 جانفي، كل فصل أتعس من لاخر، الي يقلك نظم انتخابات رئاسية في ظرف 40 يوم، توة فمة انتخابات رئاسية شفافة تتنظم في التوقيت هذا؟؟؟ و الرئيس الي بش يجي، زعمة بش يبدل الدستور؟؟؟ شكون بش يعطينا الضمانات هذي ؟؟؟ 
خلينا نبدلو دستورنا مالأول، و نبداو على أسس صحيحة، بش نضمنو التحول الديمقراطي.(هههه فيبالي بيك كرهتها هالكلمة و توجعلك راسك، أنا بيدي كيفك)

س: لا أنا ما نحبش نعاود الدستور و ننتخب مجلس تأسيسي، نحب استفتاء طول!
ج: و شكون باش يعاودلك الفصول؟؟ كيفاش بش نختاروهم؟؟ و شنية الي بش يتعاود بالضبط ! هذا الكل نختاروه بالمجلس التأسيسي! 

ختاما، حتى كان القرار فيه و عليه، راهي فرصتك يا مواطن بش تمارس حقك، برى قيد في أي بلدية تعرضك، حتى كان مش متاع حومتك، شوية دقايق و توفى الحكاية، حتى انت يا مدام كي تخرج تقضي تنجم تخطف روحك، نحاولو الناس الكل تقيد بش انجمو نوصلو لحل أمثل، و ما نعرفوش شباش يصير من هنا الغادي، أكيد الرؤية بش توضاح و تو نفهمو كل حزب علاش يمشي و علاش يجي، تي قيد شعندك تخسر، و راهو الي في البلدية على فكرة يخدمو نهار كامل،كلهم شباب، و مكونينهم بالقدا يعني مش وجوه الدودو متاع الادارات التونسية الي تكش و تنش العام 12 شهر. 

أنا أقيد اذن أنا موجود
أنا أصوت اذن انا موجود
و انت ماشي





17 juil. 2011

light تدوينة

غريبة في تونس ما بعد القصبة 3
تقسمت شطرين، الي مع و الي ضد الاعتصام
الي مع ما فهمتهمش شي يحبوا صراحة و شكون وراهم (رشودة و جماعتو بازْ)
و قالك العدوان الصهيوني و ما نعرش شنية و برشة كلام متاع أفلام
مطالب مبهمة و ظاهرة ستار لخدمة اجندات سياسية ضيقة جدا دينية بالأساس و متعطشة للكرسي و للسلطة...
مطلب اسقاط الحكومة واضح خصوصا بعد زلعات بُجْبُجْ الأخيرة، يخسر من يوم ليوم في المساندين ليه.. و لكن زعمة مازال بش يتحقق باعتصام في ساحة الحكومة الي هي اكثر بلاصة مركزة عليها الحماية؟؟؟ 
مش هذا المهم، عندي حاجات أخرى مقلقتني في الوقت الحاضر و لاهو وقت تحليل لا تبني مواقف... فما الي ابجل من هذا الكل... الي ضد يا سيدي... 

الي ضد، حدث و لا حرج... 

يبرروا في عنف البوليسية جملة وحدة، قالك يستاهلوا و باهيلهم و يصفقوا للحاكم على البطولات متاعو 

و قالك يعطيه الصحة الأمن

صحافة تتضرب و يعتقلوا عباد تتعدى طول للخدمة العسكرية و قالك لا هايل برشة و ينقذوا في البلاد؟؟؟؟ 

و الله حسب ما سمعت زادة قبل 14 جانفي، البوليس كان يحمي فينا من عناصر ارهابية و عصابات ملثمة جملة وحدة، اب اب اب


superman قداشو

و الله صراحة المشكلة الي أنا ستخايلت الي في تونس ما بعد "الثورة" فهمنا شنية التسامح و فهمنا شنية مدى خطورة انتهاك حرمة الجسد و شمعناها حقوق الانسان الخ الخ و هاك الكلام الي شبعنا بيه في التلافز و وسائل الاعلام...

surtout que ces concepts viennent d'être "démocratisés", en quelques sortes! 

و حسبت زادة الي حرية المعتقد و ممارسة الشعائر الدينية مكفولة، و هاو كل مرة تجي حاجة من جهة توري الي احنا التوانسة التطرف في دمنا مهما كان المعتقد و أيا كانت الديانة...

بعد استعراض العضلات الي عملوه الخوانجية بتحليل قتل فلان و فالتان و فالتانة و اتهام لاخر بالتطبيع و العمالة، تقلبت عليهم الحكاية، و ولا الحاكم نورمال ياسر يقتحم مسجد بش يعتقل !!!

لا، و يباركولوا زادة خاطرو ضرب و قتل ... قال شنوة يحرضو على العنف...

ما نفهمش كيفاه التحريض على العنف عقوبته الاعتقال دون محاكمة و الضرب ؟؟؟؟؟؟؟؟؟؟؟؟؟؟؟؟؟؟؟؟

توة مانيش قاعدة نلوم على بوليسيتنا، خاطر هذاكا شيعرفوا، و النظام ماهوش بش يتبدل بين عشية و ضحاها، زعبع كان يخلق في قتلة و سفاحين و مجرمة، و ماهوش جديد علينا الشي هذا... منغير ما نغطيو عين الشمس بالغربال...

أما العيب في العباد و الصفحات الي ضد دينية الدولة و مع المدنية و المواطنة الخ!!!!! مانيش فاهمة كيف نطبل و نهلل للجلادين اللذين قتلوا لتوِّهِمْ شهداء الكرامة و الحرية !!!!!

أظن أنه وقع خلط بعض المعطيات... يمكن الناس هذوما في بالهم الحاكم يضرب خاطر خوانجية ، و حتى على ضوء المعطى هذا ماعندوش مبرر كيما قال لاخر
كيما يضربوك انت في دولة دينية خاطرك لاديني ولا متحرر ولا تقدمي الخ كيما تضرب انت المدينين في دولة مدنية حقة حقة يهددوا في الأمن العام و يحرضوا على العنف...

بربي بين قوسين، للي ما يعرفنيش، راني نبخر بريحة الخوانجية و الاسلاميين

و بين قوسين زادة فمة حاجة ثابتة هي أنو الغرب شرب المخاخ الى حد الي صدقنا وحدنا وحدنا الي كل مسلم ارهابي، و من جهة أخرى كل واحد مدين يحساب في روحو بن لادن و يرى في روحو مجاهد!!!!
على كل، معلومة يمكن تصلح: البوليس ما ضربش شماتة في المتديينين كما تبادر الى أذهان الناس الكل، و لكن فقط خاطر مروضينهم على القمع و الاجرام، يعني لا اقتحم مسجد شماتة في الاسلام و لا لم المعتصمين خاطرهم خوانجية، أما فقط خاطر الحكومة الي موجودة توة و عمك البجبج ما يحبوش يتحلحزوا، و الأوامر هية هية سواء للخوانجية ولا غيرهم، الي بش ينادي باسقاط الحكومة مهما كانت أجنداتو (يلوج في بلاصة في الحكومة و شهرية و لا غاير على مصلحة البلاد) راهو بش يتڤرتف لا أكثر و لا أقل، و هذا الشي الي مش واعي بيه الشعب التونسي....

آش تحبني نقلكم ؟؟؟؟؟ ما لقيت ما نقول!! بصراحة شبعة بهامة مالجيهتين


في الآخر طلعنا كل واحد ما حاشتو كان بحريتو هو و بحريتو في فرض اسلوب تخمامو و معيشتو على الآخر !!!! 

ملا حرية هاذي!!! 
 ماللخر وقتـــاش في بر تونس كل واحد باش يعيش حر و باش يعبر على رايو بلا قيود؟؟؟
يحرضوا ولا ما يحرضوش التحريض على العنف تهمة يثبتها القضاء و ما تتعاقبش بالضرب في الشوارع و التدمديم و الوحشية و الهمجية مهما كانت الاتجاهات السياسية...

أما هات شكون يفهمك !!

مازلنا بعـــــــــــــــــــــــــاد...

و شكرا على المتابعة

29 juin 2011

تدوينة عالطاير، حول الفتوحات "الصغرى"متاع هالأيامات...

الدنيا قايمة و قاعدة خاطر فيلم نادية الفاني "لا الله لا سيدي"... جرايد معبية بمحتوى رخيص استهلاكي بحت و ضربان لغة و التلافز البلاتو وراء البلاتو و الفيلم ولاّ يهدد في الهوية و المعتقد و الدين و المقدس و كلام كبير ما فاهمو حد...

 تي بالله يا متدين يا قديس يا راهب يا خليفة الله و رسوله في الأرض يلي خايف ترعش رعشان على الدين راهو الفيلم ما جاكش يجري دق عليك باب الدار و قالك تفرج فيا بالسيف، الي يحب يتفرج (كيف العبدة لله مثلا) خليه رايض و عامل كيف، آش مدخلك فيه يؤمن ولا يكفر ولا يشرك؟؟؟؟ في شنوة باش ينفعك هذا و لا ينقص منك ؟؟؟ طريف حسنات؟؟ يا سيدي عوضهم بحاجة أخرى، ماكم ادجلو نهار نهارين هذا حرام هذا حلال و الآخرتاخو عليه
©des points Merci ... 

 آش مهاززك انت حتى الغادي شاهرا سيف الاسلام تفتح في الأفريكا و تجاهد بش تنشر دينك؟

حاجة أخرى بالله، كان انت ايمانك ضعيف لدرجة انو فيلم ينجم يقلبلك معتقداتك و لا يأثرلك على دارك و صغارك سامحني فيك عاد... تي هاك الدين مكبش فيه تكبيش بكشي يعملها بيك و يفصع بين عشية و ضحاها... و هاو طلعت لا عندك مبادئ لا شي كي ساعتين فرجة بش يدخلوك جهنم ولا برّى لوج..

يا سيدي مش لازم تتفرج

و على فكرة، الفيلم ماهوش حول الالحاد و سب الاسلام كيما روجوا بعض الجهلة و les incultes ، راهو يحكي على العلمانية و اللائكية والي مش فاهمهم يحل منجد يثقف روحو شوية

على كل رانا ماناش نمثلو في فيلم الرسالة رانا في مجتمع متمدن ديمقراطي قائم على أساس المواطنة و كل مواطن حر في علاقتو مع خالقو، مش قلتو انتوما مع حرية المعتقد؟؟

 ملا كوارث متاع وذني!!

7 mai 2011

خليوني نفرغ قلبي... القطرة الي فيضت الكاس

 بش نرجع على تصريحات الراجحي رغم الي حسب رأيي الموضوع هذا خذا اكثر من حقو...

 السيد مواطن كيفو كيف غيرو تكلم و عطا رايو، و الكلام الي قالو ماهوش جديد علينا، كل تونسي يتمتع بقدر أدنى من الوعي و المنطق فايق بالحكاية هذي... تبقى les mauvaises langues يحبو يردوها بالسيف تصريحات خطيرة و جهويات و نميمة و فتنة و لغة حي درابك الي شبعنا بيها في عهد زعبع....

و من جهة ما انجمش ننكر الي التصريحات هذي سخنت العباد و هبطتنا الكل في الشارع، بكبيرنا بصغيرنا بنسانا برجالنا بالمدين بالكافر...لحمة وحدة فكرتني في أيامات المخلوع... بعيدا عن حرب الاديولوجيات و عن التكالب الحزبي لنيل السلطة...

 ما انجمش ننكر زادة الي السيد هذا جريء برشة و قال بصوت عالي كلام تْوَتْوتُو الرجال في القهاوي...

بون يزي مالتمجيد لسي الراجحي... يا سيد يعطيك الصحة لا أكثر و لا أقل  غدروك و حتى كان تراجعت و بديت تولي متناقض في كلامك ...



من مخلفات النظام السابق الي ماعادش نحمل لا التصفيق لا عبارات الشكر و الامتنان، مش جوي القفة و التبندير و التهليل و هزان الفارينة، و مازلت عندي حساسية منهم ...

نرجعو توة للحكومة الانتقامية و تمثيلية الثورة و جهاز البوليس الفاسد و هيئة الركوب على الثورة... 

توة قداش من شهر و الحكومة هذي تلهي فينا بحاجتين: هاجس أمني، و هاجس اقتصادي...

الهاجس الأمني يتمثل في المهازل الأمنية (مش انفلاتات) الي قاعدة تصير كل يوم من براكاجات لسرقة لتحرش لشتم لـPrison break الخ... و فيها زادة بولحية الي مسيبينهم يخوفوا في النساء في الشارع... و كي حبوه يرجع الأمن، رجع سبحان الله! هبطوهم كي الذبان قتلوا الي قتلوا، ضربوا الي ضربوا و اعتقلوا الي اعتقلوا و فرغوا الحبيب بورقيبة في درجين... 

الهاجس الاقتصادي عادة واضح، حكاية الي البلاد بش تبرك و العجز و لغة حي درابك متاع بورجوازية القبة، و اعتصامات في الطرقات السيارة، تقولش علينا التوانسة خدمنا نهار ولا كنا حارڨينها... تي من أكثر الادارات تكركيرا في العالم الادارة التونسية، و تونس معروفة بمقولة موظفيها الأثيرة "ارجع غدوة" ... من غير ما ننساو "مشي حويجة"... وقتاش خدم التونسي وقتلي كان يمشي التاسعة صباحا يفصع ساعة قبل الفطور و العشية ما يرجعش جملة... 

و خلي عاد الهيئة العليا للركوب على الثورة... ما لهاونا كان بحكاية 10 و 23 سنة، و اطر و كوادر التجمع، و تراشكون يراقب ولاخر لا، تقولش علينا البلاد ماشية ستة زيت و ما ناقصنا كان انتخابات المجلس التأسيسي... فيعوض تحكي على محاسبة القتلة و السراق، وقتلي الداخلية و أجهزة القمع الكل يبترعوا بكل حرية في البلاد و أقارب بن علي نشوف فيهم كل صباح يتعداوْ من قدامي بكراهبهم، و كمال مرجان و فريعة و جماعتهم يعملوا في حملتهم الانتخابية و كأنّ شيئا لم يكن... 

تي ناس قبل قالوا: قص الراس تنشف العروق... هذا الكل هالـ100 و ڨفّة الي ڨاعدين و يجتمعوا كل درج ما فهموش الي كي تشد تحاسب المسؤولين الكل (مش كان عماد الطرابلسي ولا السرياطي بش تسكت الشعب) و تخليهم عبرة لغيرهم، ، سنكون في غنى عن الجدال العقيم متاع 10 و 23 سنة... و ينجم أي مواطن تونسي في الوقت هذاكا يترشح و ينتخب الخ...


يا تونس رانا ما رجعناش ليوم للقمع و مهاجمة المتظاهرين السلميين... رانا ما خرجناش لحظة واحدة مالنظام البوليسي و من العنف، تبقى الجهاز هذا كان مخبي راسو و جابد روحو بش الناس تستنجد بيه كي تاكل بعضها بالضبط و تتأسف على أياماتو... الي صار البارح و الأيام الفايتة يوري بالكاشف الي ما تبدل شي، آش تبعد علينا حالة سوريا ولا اليمن... 




كان بش نكمل نكتب ما نكتب كتاب كامل... و تقصتلي شاهية الكتيبة كي ريت صفحة جلال بريك "تم حجبها [...] تنفيذا للتسخير الصادر عن حاكم التحقيق بالمحكمة العسكرية الدائمة بتونس" ... و كي نشوف في أسامي رفاق و طلبة و فنانين و مدونين توقفوا توة يطلعلولي في تويتر... الي نحس فيه توة نتصور أي تونسي قاعد يحس فيه، و ما لقيتش كيفاش نعبر عليه... الكلمات لا تكفي يا تونس... حابسة دموعي و مش عارفة شباش نعمل يا تونس... مسكينة يا تونس... و مساكن أبطال و شهداء ثورة الأحرار... ان صحت تسميتها بثورة... و مسكين شعبك يا تونس الي سال دم قلبو و هو يجاهد فوق ترابك ضد الديكتاتورية و الاستبداد و القمع...

 لا عمار مشا، و لا البوليس مشا، و لا الاجرام مشا، و سي كمال اللطيف الوطني السياسي رجل الأعمال الشريف العفيف الي ما يسكرش مع الحواتة يمشكي في الشيّاب و يحرك فيهم تقولش عليه يلعب في الدامة...  (في هذا الاطار بالله يا سيد فسرلي آش عندك ضد الحواتة، ياخي تحساب روحك من طينة أعلى ولا شنوة؟؟) 

براف، لازمنا نصمدوا، و لازمنا نقولوا بصوت واحد لا ضد الثورة المضادة... (آش كرهتها هالكلمة) ... 

و على الرغم من كل هذا...

أنا متفائلة... و سأبقى متفائلة... و نعرف الي تعدى علينا الأسوأ... و الي عملنا الأصعب... و الي قطعنا شوطا مهما في نضالنا ضد الاستبداد و الظلم... و ما قعد للنظام هذا كان أيام معدودة... فصبرا يا أحرار تونس... لا بش يوقفنا بوليس، لا سبسي ، و لا عمار... النصر قريب... 


20 mars 2011

تساؤلات وجودية فيما يخص الرجولية


أولا... أريد أن أوضح انني أتوجه الى فئة معينة تنبذ النساء، أرجو ان تكون شاذة في تونسنا الغالية... أي أن الهدف ليس التعميم و بعيد كل البعد عن شن حملة ضد الرجال...
و ثانيا، اتوجه بهاته المقالة إلى كل شابة، إلى كل  أم، إلى كل طالبة، إلى كل عاملة، إلى كل ربة بيت، إلى كل متزوجة، إلى كل عزباء، و  كل امرأة حرة ناضلت من موقعها، على طريقتها و على حد جهدها ضد الاستبداد الذكوري و تلقى نفسها عاشت موقف مالأمثلة الي بش نذكرهم... 

نهارين التالي يا سيدك نتسكع في الفايسبوك، نلقى حملة شنوها صفحات (فيها بين الـ100.000 و الـ500.000 معجب) على صحفي دافع على النساء و على مجلة الأحوال الشخصية في برنامج نسائي، إلي يتهمو بالتخونيث، و إلي ردُّو شاذ جملة وحدة، و يسبُّو فيه... قلت لا باز بش يعفسو فيهم برشة بما أنو السيد لا ذنب له و عبر على رأيو بكل صراحة بل و حقُّو يتحيَّى من طرف الجميع... فما راعني إلاََّ و الناس الكل طايحة تسب فيه (كلهم من الجنس الذكري بالطبيعة) و عفسو فيه...
ياخي الي يدافع على حقوق النساء و مجلة الأحوال الشخصية يتسمى مش راجل؟؟؟؟
يسلم رجوليتكم مالا الكلكم كي هي محصورة في استبداد الرجل و في الذكورية؟؟؟؟ مالا نمشي نعمل شلاغم باش نولي قدري من قدركم و عندي الحق بش اناقش و عندي الحق بش نتبنى مواقف و مبادئ؟؟؟؟ 
 مسكينة يا تونس قد ما ناضلوا أحرارك و قد ما ضربوا المثل بالمرأة التونسية قد ما مازالوا فما رجعيين معقدين من رواحهم أولا و مالنساء ...
والله تصدقوني كان نقلكم الي أنا كي نرى خزعبلات من النوع هذا مكتوبة في الانترنيت يشدني الضحك و نستخايلهم يفدلكوا!!!!!!!!!!!
ستنى الساعة... شنية هذي معقدين مالنساء؟؟؟ يا بنتي فكّْ عليك سيبك منهم و شيهمك فيهم !!!
لا مانيش بش نسكت، و يزيني ما سكت... و لازم كل مرا تتكلم من هنا فصاعدا، و ما تخاف من حد، و ما يهمكش... سبوك؟؟؟ نورمال، عياو يسبو فيا في التعاليق و ما يهمنيش... تكلم و احڨرهم حڨرة واعرة... و راسي يسد...

نحب نفهم شكونو الي تلاعب بينا، أحنا النساء، و حكانَّا حكاية من نوع : الرجولية مبادئ... الرجولية شجاعة... الرجولية شهامة و مروؤة... الرجولية عطاء... الرجولية تضحية... الرجولية إحترام... الرجولية صدق...؟؟؟



بربي فسرلي كيفاش الرجولية مبادئ - في حين أنّ مبدأ المساواة و هو أرقى المبادئ الانسانية، و هو إلي خلى العالم يلغي الرق (أي العبودية) - ما تستعرفوش بيه ؟؟؟ و بالطبيعة يتضمن مبدأ المساواة بين الجنسين و أنتم، يا رجال آخر زمان، ما تمنوش بيه و تراوه ينقص من شأنكم بل و تحاربوا فيه باسم الشريعة و الشريعة مالشيء هذا براء؟؟


فسرلي كيفاش الرجولية شجاعة وقت ما فمَّا حتى واحد فيكم يمتلك البسالة الكافية بش يعترف بأفضال أي امرأة عليه، ابتداء من أمه إلي هزّتو في كرشها 9 شهر و عاناتو و رباتو و كبرتُّو و اطيَّبلو حتى لين ياخو مرا، و لا بأفضال المرأة الي يحبها و تحبُّو و تضحي على خاطرُو بش تنقص المشاكل و مع هذا يعتبر روحو في موضع قوة و ارقى منها؟؟

فسرلي، أي انت، كيفاش الرجولية شهامة و مروؤة و التونسي إلى يومنا هذا يعتبر أن المرأة مجرد بونيشة تخلقت بش تربي الصغيرات و تنظف الدار و اطيب الفطور و كان كَثّْرِتْ تخدم باش تصرف عليه، لكن ما عندهاش الحق في ان تكون انسانة مستقلة، عوض أن يعينها في كل مجالات الحياة و يعاملها  الند للند  وعلى قدم المساواة و يشجعها في إبداء رأيها و في تبني مواقفها الخاصة و في تشكيل شخصيتها؟؟ 


فسرلي كيفاش الرجولية عطاء و الرجل هذا سلب كل شيء مالمرأة، جهدها، صحتها، شبابها، حريتها، فلوسها، شخصيتها، و يحب توة يسلبلها طرف الحقوق الي عندها، قال شنوة "قواتهم الحجامة علينا"؟؟؟ مالا بين قوسين راهو الحقوق الي عنا مَدٌْهُمْلْنَا راجل بأتم معنى الكلمة، اسمو تحفرْ في تاريخ تونس و في تاريخ العرب و تاريخ الانسانية و هو الحبيب بورڨيبة الله يرحمو، تحداكم و تحدى أمثالكم في الخمسينات عقب الاستقلال و تجرأ و ابتكر مجلة مازال ما فهموهاش لتوة برشة عباد و لازالت تعتبر سابقة لعصرها، و مازلنا بش نطوروها و نطالبوا بأكثر حقوق، و لاخر يقلي ملاَّ حكاية و ياسر فيكم و عشرة من سطاش...

فسرلي كيفاش الرجولية تضحية و سي السيد لتوة يحب يعمل الي يحب و مرتو و أُمُّو يهبطو يكَوْرُو في الوقت البديل ولا حتى في الحصص الاضافية و ساعات يعديو وقت لا بأس بيه بناكة، و بالنسبة ليه هي من واجبها انها تتلاهى بشؤونو و تخفف عليه من مهامُّوالحياتية العسيرة برشة، بش سيادتو يلقى الوقت بش يرتاح و يتفرهد، و ما ينجمش يضحي بش يرضيها ولا يعطيها من وقتو، و كان ضحى، يشدهالها شهرين و هو يْخَلّْصِلْهَا في المزية الي تكرِّم و عملها عليها؟؟؟

فسرلي كيفاش الرجولية احترام وقتلي ما تحترمش كائن بشري كيفك كيفو و تعتبرو أقل شأنا منك و ما عندوش الحق بش يطالب في المساواة بينك و بينو في وقت ما تنجمش تعيش بلاش بيه و تستغل فيه في معيشتك قد ما تنجم؟؟؟ راهو الاحترام يفرض انك تحترمها و تحترم آراءها و وجهات نظرها و ما تسفهاش،  و تحترم مطالبها الي مش بش تنقص منك شيء بل بالعكس، بش تفيدك في المجتمع و في تطور البلاد بتجربتها و بحريتها...

فسرلي كيفاش الرجولية صدق و انت تدعي انك راجل في حين أنك ما اطبق حتى شيء من هذا، و ترفض بش تعترف بأفضال المرأة عليك و بمساواتها ليك في الحقوق و الواجبات،فقط بش تْوَرِّي، paradoxalement، إلي انت راجل و سي السيد و سبع البرمبة، و تبدى تتشوحرلها و تحرش في عينيك و تفتل في شلاغمك زعمة زعمة بش هي تخاف؟؟؟

برجولية، يعنبو الرجولية كي هي هكة!!!!!!!!!

و ختاما... أتوجه بتحياتي و تقديري إلى كل رجل آمن بالمرأة و بقدراتها و ساندها في كفاحها الدائم مهما كان شكل هذه المساندة... إلى كل رجل تم نعته بـ"الخنثاوي" ولاَّ "المايع" ولاَّ "الكافر" لمجرد دفاعه عن المرأة و وقوفه الى صفها في اقتلاع بقية حقوقها من أيدي المعقدين...

على أمل أن تتفهم الأطراف المعنية موقفي بكل موضوعية و حيادية و روح رياضية ، و على أن تصغي إلى مقالتي النسوية بكل جدية و تحاول تصلح من نفسها و تعاود تكوِّنْ الشخصية العربية، وصياغة معاني الرجولية...

13 mars 2011

البهامة التونسية... صناعة محلية

    علاش الدنيا قايمة و لم تقعد بعد و الناس الكل كالبة و هابلة و ولاتلي مسلمة فرد ضربة ؟؟؟؟!!!

   الشعب التونسي "تُوتَاكُو" بخُمَّاجُو و فسَّادو ولاَّ يحكيلي عالدين و يناشد و يطالب بدولة مسلمة و بالتطبيق الكلي للشريعة الاسلامية، كلهم تحت شعار :" الاسلام دين كامل ينظم جميع جوانب حياة الانسان" و "لا اكراه في الدين"..

لماذا يريد البعض ان يفرض تطبيق الشريعة الإسلامية بينما تونس لم تطبق يوما النظام الإسلامي و لن تكون دولة إسلامية شئتم أم أبيتم !!

بعد هذه الثورة، ثورة الكرامة و الحرية، التي اندلعت شرارتها اثر إضرام الشاب البوعزيزي النار في نفسه (و هو ما يتضارب مع الشريعة الإسلامية و يعتبر قتلا متعمدا للنفس) أصبحنا نطالب بتطبيق الدين؟؟؟

ألا يسمى هذا ركوبا على الثورة؟؟

أتحدى من يقول أن هذه الثورة قامت في ظل شعارات دينية!!!

بل ساندها شباب الفايسبوك من شيوعيين و اشتراكيين و علمانيين و ملحدين و ربوبيين(Déistes) ، و هم أغلبية المدونين التونسيين المتضررين من عمار 404!!!!!

لماذا كل هذا التحامل ضد مطلب العَلمانية و اللائكية؟؟ لماذا كل هذا التحامل ضدّ تطبيق مبادئ المساواة بين المرأة و الرجل في كل المجالات (و هو حق مضمون دستوريا)، اخص بالذكر هنا قانون الإرث، بينما قضينا 50 سنة نتمعش في ظل دولة مدنية لا تمت قوانينها للشريعة الإسلامية بصلة؟؟؟؟؟؟؟؟

بربي بالنسبة للميراث…

شحرق شعيرك كان المراة تاخو قد الرجل؟؟؟
المرأة هي أمك، هي أختك، هي بنتك، هي زوجتك و شريكة حياتك !!!
بربي تي انت يا راجل، المرأة تاخوها و تبدى تتشرط و تستنى شباش تجيبلك في الجهاز، و كان لزم تعملك هي العرس، من غير ما نحكيو على المهر الي الكلكم ترحموا على بورڨيبة الي نحاهولكم و رجّعو دينار !!! وينو الاسلام ؟؟؟؟؟

وينهم الرجال قوامون على النساء !!!

تبداوْ تلوجوا في شهرية المرأة قداش، و عندهاش كرهبة، و مستقبلها، و كان لزم ورثة بوها، و من بعد تعرسوا بيها، تخدمكم و تخدم ولادكم و داركم و تصرف عليكم و مش عاجبك مالفوق، و تحكيلي على الشريعة و تقلي الاسلام !!!!!!!

تي الواقع المرير هذا متاع المرأة التونسية وحده يبيح المساواة في الإرث كان موش أفضلية المرأة على الرجل باش تنجم تصرف مليح على سيادتو !!!!!!

فيما يخص قوانيننا الإسلامية عاللِّخِرْ و إلي ما قلّْقتْ حدّْ إلى يومنا هذا، بضع الأمثلة:

*يمنع الدين منعا باتا بيع او شرب او صنع [...] الخمور و المسكرات بينما في تونس نبيعها بصفة عادية في اغلب المغازات الكبرى و استهلاكها عادي جدا، كما نصدر أنواعا و أشكالا من الخمور و المواد الكحولية التونسية التي تمتلك شهرة عالمية اذكر منها السلتيا (من أحسن أنواع البيرة في العالم) و البوخا (ما فما منها كان في تونس)
*يمنع قانوننا الزواج للفتاة قبل 17 سنة و يبيح لها الزواج بعد سن العشرين دون موافقة الولي (يمنع الإسلام ذلك)
* ما رأيك في أن المشرع التونسي يبيح للطفل المتبني و ابن الزنا و المستلحق و الحفيد الإرث بينما الدين الإسلامي لا يسمح بذلك؟؟؟؟؟
*للفتاة العزباء الحق في إنجاب أطفال خارج نطاق الزواج و لها الحق في إسنادهم لقبها و القانون يحميها مالفوق، بينما في الإسلام تعتبر زانية
و عقابها الرجم
*حق الأم في إجهاض الجنين و تحديد النسل، الم يقل رسولنا الكريم صلعم : "تكاثروا إني مباهي بكم الأمم يوم القيامة"
*تعتبر شهادة المرأة معادلة لشهادة الرجل و في كل العقود بينما دينيا شهادة الرجل تساوي شهادة امرأتين
*للمرأة أن تكون عدل اشهاد و تزوج المسلمين بينما الإسلام لا يبيح ذلك
*للمرأة أن تكون قاضية أو رئيسة جمهورية بينما ما فماش الشيء هذا في الإسلام و حر
اااااام زقوم 
*كما يمكن للأب المتزوج أن يسند لقبه لابنه أو يستلحقه بنسبه و اعني بذلك الابن المنجب خارج نطاق الزواج عن طريق الخيانة، بينما الإسلام يعتبرهم "أبناء زنا" بلغتنا: في الحرام و يعاقب الوالدين
*يبيح الإسلام للزوج أن يضرب زوجته إذا لم تطعه بينما سوى القانون التونسي بين الزوج و زوجته و يعاقب بالسجن كل أنواع العنف مهما كانت أسبابه
*يبيح الإسلام جرائم الشرف (واحد يلقى مرتو ولا اختو على علاقة مع رجل) بينما هذا يسمى إجراما في قانوننا و يعاقبه بالزج في السجن
*بالنسبة لأنواع الطلاق الموجودة في مجلة الأحوال الشخصية (إنشائي؛ للضرر و بالتراضي) فتعتبر ثورة في قوانين الطلاق في العالم و خارجة عن نطاق الإسلام
*لا رجوع بعد الطلاق الثالث بينما الدين الإسلامي يسمح بذلك شريطة أن تتزوج المرأة بآخر ثم تطلقه
*منع تعدد الزوجات و نكاح الجواري بينما يسمح الإسلام بذلك (أربع زوجات و "ما ملكت أيمانكم")
*قطع يد السارق في الإسلام واجبة بينما يحتفظ السارق عندنا بيده سليمة معافاة ^^
*عقود الزواج : يمكن للزوجين السعيدين أن يختارا بين عقد ذي ملكية مشتركة أو نظام الفصل بين الأملاك بينما الإسلام لا يبيح إلا الصنف الثاني
*يعتبر الإسلام المرأة عورة من إصبع ساقها إلى رأسها بينما في تونس نلبسو كيما نحبو فنتجول صيفا على شاطئ البحر بالبيكيني و شتاء نلبس الميني في العلبات الليلية و البريمة يجي يتعرضنا:P
*يمنع الإسلام على المرأة السفر بمفردها دون محرم بينما يعطينا القانون التونسي الحق بأن نصول و نجول جميع أنحاء الكرة الأرضية و حتى الفضاء الخارجي (كان نقدروا عليه) بمفردنا
*يحرم الإسلام اغلب الفنون رسما و غناء و شطيحا و رديحا بينما المرأة الفنانة تكرم في تونس و عندنا وزارة كاملة برجالها و نسائها للنهوض بالفن و الثقافة
*منع عقوبة الإعدام نهائيا بينما الشريعة الإسلامية تفرض القصاص في اغلب الجرائم بما فيها الزنا
*يعتبر المولد النبوي الشريف بدعة و كل بدعة ضلال بينما في تونس نحتفل به سنويا و بالعصيدة اللذيذة

كل هذا ما استحضره الساعة على سبيل الذكر لا الحصر ... و الأمثلة عديدة و عديدة جدا !

كيف لنا ان نكون دولة ديمقراطية تتبنى حقوق الإنسان و التعددية السياسية و الفكرية و الدينية و حرية التعبير و الصحافة و المساواة بين الجنسين و ذلك بإمضائنا على اتفاقيات و معاهدات دولية تضمن ما تم ذكره و تتضارب مع الشريعة الاسلامية!!!!!!

كفانا كذبا و نفاقا و انتهازية!!

كفانا غباء و رياء و ازدواجية !!!

كفانا ظلما و ازدراء و انفصاما في الشخصية!!!!

نأخذ ما يرضي غرورنا كرجال شرقيين (رويِّقْ "سي السيد") ، نصبح شرفاء و متزمتين أحيانا، و يوم السبت يعلم ربِّي في حانة السعدي و الشيلينق!!!!!

من المؤكد ان من يقومون بحملة ضدّ اللائيكية و العلمانية و المساواة بين الجنسين ينتمون الى صنفين:
**الصنف الاول: المتطرفون الاسلاميون اعداء الديمقراطية و حرية التعبير المتخفون تحت قناع الاسلام المعتدل و التسامح و احترام الرأي و الرأي الآخر و التمسك بمكاسب الدولة التونسية (ستناوْهم يتمسكنوا حتى يتمكنوا كيما يقولوا ناس بكري)
**الصنف الثاني: الي يفلحوا و مش فاهمين شي مالشريعة الاسلامية، من نوع "مهبولة و رغردولها في وذنها" أي قالولهم العلمانيين كفار قالوا اي صحييييح و لازم نسبوهم و نتعرضولهم في الشوارع، و مش فاهمين الي دوب ما يكملوُا مالعلمانيين تو يتلاهاولهم بالبيران و المونوپري و راس الطابية و البحر الازرڨ و يقتلوهم الخوامجية فردا فردا ...

و ختاما، اطلب من الجميع ان يراجعوا مواقفهم وان يتروُّوا و  يطالعوا جميع وجهات النظر بكل موضوعية و حياد قبل التفوه بالسخافات، و ذلك احتراما لاختلاف الرأي، و شكرا!